تخيل خط مستقيم أو غير مستقيم موصل بين نقطتين. غير مستقيم يعنى ايه؟ يعنى مش شكل واحد.
* تأمل فى مفهوم 'الحفظ' و 'الفهم' ، ولو تتذكر أشارت للنقطة دى فى مقالة من المستوى السابق (الأساسيات) وعلاقتها بالمرونة.
هنا هنرفع درجة المفهوم شويه، الحفظ مش شئ سلبى فى المطلق، وهو والفهم 'متضايفات'، يعنى مينفعش واحد بدون التانى. حفظ من غير فهم شئ عبثى جدا ولا علاقة له بالانسان العاقل؛ لأن الحفظ عملية أوتوماتيكية بيعملها العقل مع الذاكرة بعد الفهم وإدراك الشئ. حالة الإدراك دى بتنشئ طاقة جواك تقدر تسميها برمجة الفكرة أو الشئ ده ثم على الفور بتحسها كمشاعر مجسدة فى الجسد. ودا اللى بيؤدى للحفظ.
وعشان كده بتسمع ان الشخص الهادئ اللى بيعرف يصوب تركيزه تجاه فكرة أو شئ معين ذاكرته قوية؛ لأنه عزل الصوت الداخلى تجاه أى شئ إلا الفكرة اللى محددها. فبيبقى الاحساس نقى، والتفاعل معاها بيبقى عالى.
* الفهم نتيجة عمليات عقلية تحليلية مبنية على معطيات (بيانات حاضرة الآن) وخبرات سابقة مُخزنة فى ذاكرتك، العمليات دى نفسها بتشتغل بناءاً على نظام مُتكوّن فى العقل (نظام التشغيل). عقلك بيشتغل ازاى؟ مدى قوته؟ هل فيه تكنيك فى حالة الضغط تقدر تبقى هادى ومركز على شئ محدد؟ وهكذا..
التحليل والربط بين المعلومات او الخبرات السابقة ده شكل من أشكال التواصل مع نفسك.
(والنقطة دى لأنها معتمدة على عوامل متعددة + ممتعة، هتكلم فيها لاحقاً بتمعن وسرد مفصل)، ابحث وشوف.
تعالى للعنكبوت:
لو شوفت شبكة العنكبوت في ضوء الشمس، هتحس إنك قدام نظام هندسى بديع .خيوط رفيعة ولكن مترتبة بدقة، دايرة ورا دايرة، وخطوط طالعة من النص كأنها طرق سريعة.
الشبكة بالنسبة له مش بس بيت إنما جهاز استقبال وإرسال.
أي حشرة تخبط في خيط؟ يحصل اهتزاز.
الاهتزاز يمشي لحد المركز.
العنكبوت يلقط الرسالة: 'فيه عشوة وصلت'.
فالراجل مبيجريش ورا الفريسة، سايب الشبكة تشتغل مكانه، وهو بيتدخل في الوقت المناسب.
ده بالظبط شكل العقل المنظم، لما يكون عندك شبكة مفاهيم مترابطة، أي معلومة جديدة تخبط في خيط، الاهتزاز يوصل للمركز. فتحس فورًا: المعلومة دي شبه كذا، أو دي عكس كذا،
أو دي بتكمل فكرة قديمة. لكن لو مفيش شبكة، كل معلومة تيجي تبقى لوحدها، مفيش اهتزاز، مفيش اتصال.
الحفظ هنا بيبقى عشوائي. لكن لما الشبكة تبقى مبنية بفهم،
أي إضافة جديدة تندمج تلقائيًا. وده بيرجعنا للخط اللي بين نقطتين. المسار المستقيم هو الحفظ الآلي (طريق واحد). توصّل وتخلص.
المسار غير التقليدى، الغني، هو الفهم. بيمر على نقاط أكتر، بيلمس معاني أكتر، بيبني شبكة أوسع. ممكن يكون أطول شوية،
لكن أقوى.
في الآخر، مش الهدف إنك توصل بسرعة بين نقطتين،
لكن إنك تبني شبكة تخليك مُدرك الأحداث.
واللي عنده شبكة قوية،
مبيجريش ورا كل معلومة.
بيسيب الشبكة تشتغل..
وبيتدخل في الوقت المناسب.